Monday, 5 November 2012

Majeed Amjad

Majeed Amjad 
June 29, 1914 - 1974
1.
Dil Ne Ek Ek Dukh Saha Tanha

 Dil Ne Ek Ek Dukh Saha Tanha
Anjuman Anjuman Raha Tanha

Dhalte Saayon Mein Tere Kooche Se
Koi Guzra Hai Baaraha, Tanha

 Teri Aahat Qadam Qadam, Aur Main
Us Mayi’yat Mein Bhi Raha Tanha

Kuhna Yaadon Ke Barf-E-Zaaron Se
Ek Aansoo Baha, Baha Tanha

 Doobte Saahil Ke Mod Pe Dil
Ik Khandhar Sa Raha Saha, Tanha

Goonjta Reh Gaya Khalaon Mein
Waqt Ka Ek Kehkaha, Tanha
2.
Kaash main tere bun-e-gosh mein bunda hota

 
Raat ko bekhabri mein jo machal jata main
To tere kaan se chup chaap nikal jata main

Subha ko girtey jab teri zulfon se baasi phool
Mere kho jaaney pe hota tera dil kitna malool

Tu mujhe dhoondti kis shoq se ghabrahat mein
Apney mahkey huey bistar ki, har ik silwat mein

Junhi karteen teri narm unglyaan mehsoos mujhe
Milta is gosh ka phir gosha-e-maanoos mujhe

Kaan se tu mujhe hargiz na utaara karti
Tu meri judaai kabhi na gawaara karti

Yoon teri qurbat-e-rangeen ke nashey mein madhosh
Umr bhar rehta meri jaan main tera halqa bagosh

Kaash main terey bun-e-gosh main bunda hota

3.
 panwaaRi

booRhaa panwaaRi, us ke baaloN meN maang hai nyaari
aankhoN meN jeewan ki bujhti agni ki chingaari
naam ki ik haTTi ke andar boseeda almaari
aage peetal ke taKhte par us ki duniyaa saari

paan, kathaa, sigreT, tambaaku, choona, long, supaari

umr us booRhe panwaaRi ki paan lagaate guzri
choona gholte, chhaaliyaa kaaTte, kath pighlaate guzri
sigreT ki Khaali DibbiyoN ke mahal banaate guzri
kitne sharaabi mushtarioN se nain milaate guzri

chand kaseele pattoN ki gutthi suljhaate guzri

kaun is gutthi ko suljhaaye, duniyaa aik paheli
do din aik phaTi chaadar meN dukh ki aandhi jheli
do kaRwi saanseN leeN, do chilmoN ki raakh unDeli
aur phir us ke ba'ad na poochhoo, khel jo honi kheli

panwaaRi ki arthi uThi, baaba, Allah beli

sub'h bhajan ki taan manohar jhanan jhanan lehraaye
aik chitaa ki raakh hawaa ke jhonkoN meN kho jaaye
shaam ko us kaa kamsin baalaa baiThaa paan lagaaye
jhan jhan, Than Than, choone waali kaTori bajti jaaye

aik patangaa deepak par jal jaaye, doosraa aaye

No comments:

Post a Comment