Sunday, 4 November 2012

Irfan Sattar

Thumbnail 
Irfan Sattar
1.
Yun Hi Be-Yaqeen Yunhi be-nishaan


yuNhi bey-yaqeeN yuNhi bey-nishaaN, meri aadhi umr guzar gayi
kahiN ho na jauN maiN rayigaaN, meri aadhi umr guzar gayi

kabhi sayibaaN na tha baham, kabhi kehkashaN thi qadam qadam
kabhi bey-makaaN kabhi la-makaaN, meri aadhi umr guzar gayi

terey wasl ki jo naveed hai, woh qareeb hai ke ba'yeed hai
mujhey kuch khabar to ho jaan-e-jaaN, meri aadhi umr guzar gayi

kabhi mujh ko fikr-e-ma'aash hai, kabhi aap apni talaash hai
koyi gur bata merey nukta-daaN, meri aadhi umr guzar gayi

kabhi zikr-e-hurmat-e-harf meiN, kabhi fikr-e-aamad-o-sarf meiN
yuNhi rizq-o-ishq key darmiyaaN, meri aadhi umr guzar gayi

koyi ta'ana-zan meri zaat par, koyi khanda-zan kisi baat par
paey-dil-nawazi-e-dostaaN, meri aadhi umr guzar gayi

abhi waqt kuch merey paas hai, yeh khabar nahiN hai qayaas hai
koyi kar gila merey bad-gumaaN, meri aadhi umr guzar gayi

usey paa liya usey kho diya, kabhi hans diya kabhi ro diya
baRi mukhtasar si hai dastaaN, meri aadhi umr guzar gayi

teri har daleel bohat baja, magar intizaar bhi ta-kuja?
zara soch to merey razdaaN, meri aadhi umr guzar gayi

kahaN kayinaat meiN ghar karuN, maiN yeh jaan looN to safar karuN
isi soch meiN tha ke nagahaaN, meri aadhi umr guzar gayi
2.
Chaand Bhii Khoyaa Khoyaa Saa Hai


ChaaNd bhii khoyaa khoyaa saa hai, taare bhii Khwaabiidaa haiN
aaj fizaa ke bojhalpan se lahje bhii sanjeedaa haiN

jaane kin kin logoN se is dard ke kyaa kyaa rishte the,
hijr kii is aabaad-saraa meN sab chehre naa-diidaa haiN
[naa-deedaa: unseen]

itne barsoN baad bhii donoN kaise TuuT ke milte haiN
tuu hai kitnaa saadaa-dil aur ham kitne pechiidaa haiN

sun jaanaaN ham tark-e-taalluq aur kisii din kar lenge
aaj tujhe bhii ujlat sii hai, ham bhii kuchh ranjiidaa haiN

ghar kii voh maKhduush imaarat gir ke phir taamiir huii
ab aangan meN peD haiN jitne saare shaaKh-bariidaa haiN

is bastii meN ek saDak hai jisse hamko nafrat hai
uske niiche pagDanDii hai jiske ham gir-viidaa haiN
(gir-veeda: enamoured, attached, captivated)
3.
 Koi mila to kisi aur ki kami hui hai

Koi mila to kisi aur ki kami hui hai
So dil ne be-talabi ikhtiyaar ki hui hai

JahaaN se dil ki taraf zindagi utarti thi
Nigaah ab bhi usi baam par jami hui hai

Hai intezaar use bhi tumhaari khushbu ka
Hawaa gali mein bahut der se ruki hui hai

Tum aagaye ho to ab aayiina bhi dekhenge
Abhi abhi to nigaahoN mein raushni hui hai

Hamara ilm to marhun e lauh e dil hai miyaN
Kitaab e aql to bas taaq par dhari hui hai

Banao saaye, haraarat badan mein jazb karo
K dhoop sehn mein kab se yuNhi paRi hui hai

Nahi nahi, main bahut khush raha huN tere beghair
Yaqeen kar K yeh haalat abhi abhi hui hai

Woh guftagoo jo meri sirf apne aap se thi
Teri nigaah ko pahunchi to shairy hui hai

No comments:

Post a Comment