Tuesday, 9 October 2012

Ahmad Nadeem Qasmi

Ahmad Nadeem Qasmi 
(real name, Ahmad Shah Awan) 
(November 20, 1916 – July 10, 2006) 
Ahmad Nadeem Qasmi was a legendary Urdu language Pakistani poet, journalist, literary critic, dramatist and short story author. Qasmi was a major figure in contemporary Urdu literature.He wrote more than 50 books of poetry, fiction, criticism, journalism and art to his credit  His poetry stood out among his contemporaries' work for its unflinching humanism.
1.
Andaz Hu Bahu

Andaz Hu Bahu Teri Awaz Pa Ka Tha
Dekha Nekal Kay Ghar Say Tu Jhonka Hawa Ka Tha

Is Husan Itafaaq Pay Lut Kar Bhi Shaad Hoon
Teri Raza Jo Thi Wo Taqaza Wafa Ka Tha

Dil Raakh Ho Chuka Tu Chamak Or Bhar Gaee
Yah Teri Yaad Thi Ya Amal Kemiya Ka Tha

Is Rishta Lateef Kay Israar Kia Khulain
Tu Samnay Tha Or Tasawer Khuda Ka Tha

Chup Chup Kay Raoon Or Sir Anjamun Hansoon
Mujh Ko Yah Mashwara Meray Dard -e- Aashana Ka Tha

Toota Tu Kitnay Aaina Khano Pay Zadd Pari
Atka Howa Galay Main Jo Pather Sada Ka Tha

Hairan Hoon Keh Daar Say Kesay Bacha Nadeem
Wo Shaks Tu Gareeb o Gayoor Intahaa Ka Tha
2.
mujhse kaafir ko tere ishq ne yuuN sharmaayaa

mujhse kaafir ko tere ishq ne yuuN sharmaayaa
dil tujhe de ke dhaRkaa to Khudaa yaad aaya

chaaraagar aaj sitaaroN kii qasam Khaa ke bataa
kisne insaaN ko tabassum ke liye tarsaayaa

nazr kartaa rahaa maiN phuul ke jazbaat use
jisne patthar ke khilonoN se mujhko bahlaayaa

usne andar ko’ii fankaar chhupaa baiThaa hai
jaante-buujhte jis shaKs ne dhokaa Khaayaa
3.
 shaam ko subah-e-chaman yaad aayi

shaam ko sub’h-e-chaman yaad aa’ii
kis kii Khushbuu-e-badan yaad aa’ii

chaaNd jab duur ufaq par Duubaa
tere lahje kii thakan yaad aa’ii

yaad aaye tere paikar ke Khutuut
apnii kotaahii-e-fann yaad aa’ii

jab KhayaaloN meN ko’ii moR aayaa
tere gesuu kii shikan yaad aa’ii

din shuaaoN se ulajhte guzraa
raat aa’ii to kiran yaad aa’ii
4.
Tujhe Kho kar bhi tujhe paun jahan tak dekhun

tujhe Kho kar bhii tujhe paauuN jahaaN tak dekhuuN
husn-e-yazdaaN se tujhe husn-e-butaaN tak dekhuuN

tuune yuuN dekhaa hai jaise kabhii dekhaa hii na thaa
maiN to dil meN tere qadmoN ke nishaaN tak dekhuuN

sirf is shauq meN puuchii haiN hazaaroN baateN
maiN teraa husn, tere husn-e-bayaaN tak dekhuuN

vaqt ne zehn meN dhundhlaa diye tere khadd-o-Khaal
yuuN to maiN TuuTte taaroN kaa dhuaaN tak dekhuuN

dil gayaa thaa to ye aaNkhen bhii ko’ii le jaataa
main faqat ek hii tasviir kahaan tak dekhuuN

ek haqiiqat sahii firdaus meN huuroN kaa vajuud
husn-e-insaan se nipat luuN to vahaan tak dekhuuN
5.
 Ret se but na banaa ai mere achchhe fankaar
Ek lamhe ko Thahar, maiN tujhe patthar laa duuN
maiN tere saamane ambaar lagaa duuN lekin
kaun se rang kaa patthar tere kaam aayegaa
surKh patthar jise dil kahatii hai bedil duniyaa
yaa vo patthraa’ii hu’ii aaNkh kaa niilaa patthar
jis meN sadiiyoN ke tahayyur ke paRe hoN Dore

kyaa tujhe ruuh ke patthar kii zaruurat hogii
jis pe haq baat bhii patthar kii tarah girtii hai
ik vo patthar hai jise kahte haiN tahziib-e-safed
us ke mar-mar meN siyah Khuun jhalak jaataa hai
ik insaaf kaa patthar bhii to hotaa hai magar
haath meN teshaa-e-zar ho to vo haath aataa hai

jitne mayyaar haiN is daur ke sab patthar haiN
sher bhii raqs bhii tasviir-o-Ghinaa bhii patthar
mere ilhaam teraa zahn-e-rasaa bhii patthar
is zamaane meN har fan kaa nishaaN patthar hai
haath patthar haiN tere merii zubaaN patthar hai
ret se but na banaa ai mere achchhe fankaar
6.
Kis Ko Qaatil Main Kahun


kis ko qaatil maiN kahuuN kis ko masiihaa samajhuuN
sab yahaaN dost hii baiThe haiN kise kyaa samajhuuN

vo bhii kyaa din the ke har vah’m yaqiiN hotaa thaa
ab haqiiqat nazar aaye to use kyaa samajhuuN

dil jo TuuTaa to ka’ii haath du’aa ko uThThe
aise maahaul meN ab kis ko paraayaa samajhuuN

zulm ye hai ke hai yaktaa terii begaanaaravii
lutf ye hai ke maiN ab tak tujhe apnaa samajhuuN
 

No comments:

Post a Comment